Цинхуа университети халқаро муносабатлар факультети декани, профессор Ян Сюетонгнинг айтишича, Украинадаги жанговар ҳаракатлар келгуси йилда ҳам тўхтамайди, можаро фақат сиёсий омил туфайли тўхташи мумкин, бироқ томонлардан бири музокараларга рози бўлмагунча бунинг иложи йўқ. У глобал тинчлик форуми арафасида ўтказилган матбуот анжуманида ўз фикрлари билан ўртоқлашган. 

«Бу йил, ҳозирги аксил-глобаллашув тенденцияси сабаб Украинадаги уруш тугамайди. Келгуси йил ҳам якунланиши мумкинлигини кўрмаяпман. Келгуси йилнинг шу вақтида ҳам жанговар ҳаракатлар давом этиши мумкин», деди у.

Мутахассиснинг фикрича, узоқ давом этган жанглар жанг майдонидаги икки томоннинг ҳарбий кучлари тенг эканлигини ва бир йил ичида ҳар икки томоннинг устунликка эришиш эҳтимоли жуда камлигини кўрсатади.

Ян Сюетонгнинг қўшимча қилишича, сиёсий омил можарога чек қўйиши мумкин, аммо бунинг учун ҳар икки томон ҳам музокаралар олиб бориш иродасига эга бўлиши керак. Унинг аниқлик киритишича, шу сабабли Швейцарияда Украина бўйича яқинда бўлиб ўтган конференция тинчлик сари ҳаракатга ҳисса қўшмади, чунки бир томоннинг иштирок этишига рухсат берилмаган.

Бунгача Украина президенти девонхонаси раҳбари Андрей Ермак Киев Россия билан мулоқотни қайта тиклашга қарши эмаслигини ва Швейцарияда бўлиб ўтган «тинчлик» конференцияси воқеаларини унга ўтказиш имкониятини қидираётганини айтганди. Унга кўра, музокаралар ташкил этиш учун иккинчи саммитга Россия Федерацияси таклиф қилиниши мумкин.