Тошкент шаҳрида 19 йил олдин қотилликка қўл уриб яшириниб юрган аёлга суд ҳукми ўқилди.

2003 йил 2 апрел куни содир бўлган қотиллик жиноятига гувоҳ бўлган қизнинг айтишича, онаси ўзини ва қизини ҳимоя қилиш мақсадида эрининг қотилига айланган эди.

– Агар мени ҳимоя қилмаганида иккимизни ҳам ўлдириши мумкин эди. У ўша даражага етиб бўлганди, – дея эслайди қиз.

Маълум бўлишича, оилавий жанжал эрнинг спиртли ичимликларга ружу қўйгани сабаб йиллар давомида такрорланиб келган. Ўша куни ҳам эр турмуш ўртоғидан ичкиликка пул талаб қилиб, қаттиқ жанжал қилган ва қўлидаги пичоғи билан таҳдид қилган.

– У шунчалик жанжал қилдики, сабр косамиз тўлди. Қизим келиб тинчлантирмоқчи бўлди, мен эса қизимни ўлдириб қўймасин деб қўлидаги пичоқни тортиб олдим. Ва ўзим билмаган ҳолатда пичоқни эримга санчдим, – дейди 19 йилдан бери ўзи туғилган Қозоғистонда яшириниб яшаб келган аёл.

Қизининг айтишича, аёл воқеадан кейин у учун яшашини айтган ва қизининг маслаҳати билан қотиллик қуролини яшириб, ўзи қочқинликка чиқиб кетган.

– 19 йил озодликда юрдим, лекин буни яшаш деб бўлмайди. Мен жазо муқаррарлигини доим ҳис қилганман, – дейди аёл.

Суд терговида гумонланувчининг маълум қилишича, марҳум эркак доим уни калтаклаб келган, бироқ у қизининг тирик етим бўлмаслигини истаб сабр қилиб келган.

– Ҳаммаси жуда тез содир бўлди, – дея эслайди аёл.

Суд аёлга нисбатан Жиноят кодексининг 97-моддаси 1-қисми билан жиноят иши қўзғатилиб, айбдор деб топилгани, 57-моддани қўллаб 8 йил муддатга озодликдан маҳрум қилингани, шунингдек, судланувчига нисбатан 2003 йилдан бошлаб қабул қилинган аминистия актларини қўллаб тайинланган жазо муддати учдан бирига қисқартирилгани ва тайинланган жазо тўлиқ ўтаб бўлингани сабабли унга нисбатан қўлланилган қамоққа олиш тарзидаги эҳтиёт чораси муносиб хулқ-атворда бўлиш тўғрисидаги тилхат эҳтиёт чорасига ўзгартирилганини маълум қилди.

Юқоридагилардан келиб чиқиб, суд аёлни дарҳол суд залидан озод этиш ҳақида қарор қабул қилди.