АҚШ президенти Жо Байден лавозимига киришганидан бери мамлакат бўйлаб иккинчи ишчи ташрифни амалга оширди. У Мичиган штатидаги коронавирусга қарши вакцина чиқарувчи  «Pfizer» компанияси заводида бўлди.

Байденнинг чоршанба кунги ташрифи Висконсинга белгиланган.

Президент Байденнинг ташриф йўналишлари, экспертларга кўра, шунчаки тасодиф эмас: айнан шу икки штат демократлар номзоди Трампдан ўзиб, ғалаба қозонишини таъминлаган. Ўз-ўзидан 2024 йилдаги сайловлар чоғи у номзодини қўйган тақдирда ҳал қилувчи штатлар қўллаб-қувватловини олдиндан кафолатлаб қўймоқчи, деган фикр туғилади.

Бироқ Оқ уйдагилар Мичиган ва Висконсинга ташрифларнинг  бўлажак президентлик сайловларига умуман дахли йўқлигини таъкидлашди. Бу штатларда ишсизлик даражаси юқори, Сенат ва губернаторлик учун сайловларга оз қолди. Байденнинг ташрифларидан кўзланган мақсадлар бутунлай бошқа.

Аслида кўпчиликнинг фикрича, 78 ёшли Байден 4 йиллик бир муддатни ўтаб берса ҳам катта гап. Ахир у давлат раҳбарлигига сайланган энг кекса сиёсатчи сифатида АҚШ тарихига кирди.

Шунга қарамасдан, Байденнинг номлари сир қолишини сўраган баъзи яқин ёрдамчилари у кейинги муддатга ҳам номзодини қўймоқчилигини «Foxnews»га маълум қилишган.