«Бақирма, пулларни чиқар. Йўқса, отиб ташлайман, ўласан!» — юз-кўзига қора ниқоб тақиб, қўлларига қўлқоп кийган, пешонасига тўпонча тиркаган шахснинг ўдағайлашидан аёл қалтираб қолди. Ёрдам сўраб бақирганида, аёлга ҳужум қилаётган эркак куч ишлатиб, унинг оғзини қўллари билан ёпди. Қаршилик кўрсатганида, тан жароҳати олди.

Тун қоронғусида ҳовлида турмуш ўртоғининг ваҳимали бақирганини эшитиб югуриб чиққан Ҳ.Ш.нинг биқинига пичоқ тиркалди, босқинчининг шериги ҳам бор эди. Ҳ.Ш. сал ҳаракатланса пичоқнинг ўткир тиғидан қаттиқ жароҳатланиши бор гап. Босқинчи Ҳ.Ш.дан ортиқча ҳаракат қилмасликни, овоз чиқармаслигини, йўқса уни ҳам, аёлини ҳам ўлдириб юборишини айтиб пўписа қилади. Аммо Ҳ.Ш. пайт пойлаб, биқинига қаттиқ тиркалиб турган пичоқнинг ўткир тиғли томонини «даст» ушлаб олишга улгурди. Босқинчи пичоқнинг дастасини бор куч билан тортганида Ҳ.Ш.нинг қўл кафти ва бир нечта бармоқлари шилиниб, кесилди. Шунга қарамай, ҳовлидаги стул билан нотаниш шахсларга қаттиқ қаршилик кўрсатади. Нотаниш шахслар эса унга бас кела олмасликларига кўзлари етиб, жуфтакни ростлашди.

***

«Зудлик билан ички ишлар органларига ҳамда «Тез ёрдам»га қўнғироқ қилдим. Бу пайтда аёлим қўрқувдан ўзини йўқотиб, ҳушдан кетганди. Қизимиз ўз ётоқхонасида эди. Яхшиям ҳовлига чиқиб улгурмаган экан», — деди фуқаро Ҳ.Ш. судда.

Ушбу иш Жиноят ишлари бўйича Ромитан туман судида кўриб чиқилган. Маълум бўлишича, асли қашқадарёлик бўлган Н.И. аввалдан таниши бўлган Ш.Н.га қўнғироқ қилиб, қарзини беришини талаб қилган. Ш.Н. айни пайтда пули йўқлиги ва қўлига пул тушиши билан уни қайтаришини билдирган. Шунда Н.И. унга тезда Бухорога етиб келишини ва «соққали» иш чиқиб қолганини айтган. Ш.Н. Бухорога келгач, Н.И. унга Бухоро тумани «Шергирон» МФЙ, «Деҳимиёна» қишлоғида яшовчи бир фуқаронинг уйини «тунаш» таклифини берган. Бу орқали ҳам қарзидан қутулишини, қолган қисмини эса тенг бўлаклаб олиш мумкинлигини айтган. Ш.Н. шак-шубҳасиз бу «таклиф»га кўнган.

Н.И. ҳамда Ш.Н. ўзаро тил бириктирган ҳолда ўз режаларини амалга оширишга киришишган. Бухоро туманида яшовчи Ҳ.Ш.нинг хонадонига яширинча кириб, хонадон эгаларига ҳужум қилишган ва босқинчилик жиноятини содир этишган. Режаларини охиригача амалга ошира олмай, қаршиликка учраган бу шахслар ўзларидан из қолдиришган. Жиноят содир этилганининг иккинчи куниёқ қўлга олинган Н.И. ҳамда Ш.Н.лар илгари ҳам бир неча маротаба судланган ва «ўтириб чиққан» шахслар экани маълум бўлди.

Жиноят ишлари бўйича Ромитан туман суди ҳукми билан ҳар икки шахсга нисбатан Ўзбекистон Республикаси Жиноят кодексининг тегишли моддалари билан 10 йилу 6 ойдан муддат билан озодликдан маҳрум қилиш жазоси қўлланилди. Босқинчилар ушбу жазони қаттиқ тартибли колонияларда ўтайдиган бўлди.