Европа Иттифоқи Россияга қарши янги санкцияларни жорий этишга ҳозирланмоқда.

Европа Комиссияси президенти Урсула фон дер Ляйенга кўра, чекловлар энергетика ва молия секторларини қамрайди.

Янги санкцияларнинг жорий этилиши Россия президенти Владимир Путиннинг Украина президенти Владимир Зеленский билан учрашувни рад этгани ва ўт очишни тўхтатишдан бош тортганига жавоб деб баҳоланмоқда.

«Президент Зеленский учрашувга тайёр эди. Аммо президент Путин келмади. Бу эса Путиннинг асл ниятини кўрсатмоқда: у тинчликни истамайди. Биз учун муҳими тинчликдир. Шу боис ҳам биз Путин тинчликка тайёр бўлмагунига қадар унга босимни кучайтиришимиз керак», – деган Урсула фон дер Ляйен.

Янги санкциялар Россия банклари, соядаги флоти ва «Шимолий оқим» газ қувурига татбиқ этилади.

ЕИ янги санкциялар борасида АҚШ ҳам муштарак позицияда бўлишига умид билдирган.

«Бу санкциялар (Россияни) хурсанд қилмаслиги табиий. Россиянинг нефть ва газ сотувидан даромади уруш бошлангунга қадар даврга солиштирганда қарийб 80 фоизга камайган. Россияда бюджет тақчиллиги шиддат билан ортмоқда... Биз президент Путин музокаралар столига ўтириши учун янада кўпроқ чоралар кўришга шаймиз», – деган Еврокомиссия президенти. 

DW хабарига кўра, 20 май куни эълон қилинадиган санкциялар тарихдаги энг кўламдор чеклов чоралари саналади. Брюссель Москвага қарши тўрт режимда: Украина босқини, инсон ҳуқуқлари бузилиши, гибрид уруш ва кимёвий қуролни қўллаш учун жазо чоралари кўради.

Аввал хабар берганимиздек, 16 май куни Истанбул шаҳрида Россия ва Украина вакиллари ўзаро музокара ўтказди. Тинчлик сулҳига эриша олмаган томонлар асирлар алмашувига келишган, холос.

Истанбул музокаралари ортидан «Россия раҳбарияти Украинада урушни давом эттиришни кўзламоқда» деган фикр янада кучайган.

Маълумот ўрнида, аввалроқ Европа Иттифоқи Москва Украинада сулҳ битимини рад этишда давом этса янги санкциялар ишга тушишидан огоҳлантирганди.

ЕИ Россия Украина ҳудудига бостириб кирган 2022 йил 24 февралдан кейиноқ Москвага қарши санкцияларни жорий эта бошлаган.