Хитойда тарқалган коронавирус эпидемиясининг фойдали жиҳатлари аниқланди. АҚШнинг NASA коинот агентлиги маълумотларига кўра, Ухан шаҳри осмони кутилмаганда жуда тоза кўриниш олган.

Эслатиб ўтамиз, 2019 йилнинг декабр ойида касаллик тарқагач, Хитой ҳукумати карантин жорий этди. Натижада кўплаб завод ва фабрикалар фаолияти тўхтатилди.

NASA томонидан хабар қилинишича, гарчи бу чора-тадбирлар иқтисодий жиҳатдан зарар келтирган бўлса-да, экологик жиҳатдан жуда катта фойдага сабаб бўлган. «Биз биринчи бор атмосфера бу қадар тоза кўриниш олганига гувоҳ бўлмоқдамиз», — дейилади NASA баёнотида.

Ахборотда айтилишича, аввалига фақат Ухан шаҳри осмони тозалана бошлаган. Кейинчалик ён-атрофда ҳам карантин ҳолати жорий этилгач, атмосферага чиқаётган зарарли тутунлар 10-30 фоизга камайган.

Хабар қилинишича, 2008 йилги иқтисодий инқироз вақтида ҳам экология анча тозаланган. Аммо ўша вақтда атмосфера ҳозиргидек бирдан эмас, балки аста-секин тозаланиб борган.