БМТ Хавфсизлик кенгашининг 2 март куни бўлиб ўтадиган йиғилиши АҚШ президентининг рафиқаси Мелания Трамп раислигида ўтади. Бу ҳақда АҚШнинг БМТдаги доимий вакили Майк Уолц маълум қилди.

«Биз тарих яратяпмиз! Мелания Трамп АҚШ тарихида Хавфсизлик кенгашида раислик қиладиган илк биринчи хонимга айланади. Бу Американинг Кенгашдаги раислигининг илк кунида юз беради. БМТни яна буюк қиламиз!» — деб ёзди Уолц ўзининг Х ижтимоий тармоғидаги саҳифасида.

Маълумот учун: БМТ Хавфсизлик кенгашидаги муваққат раислик 1 мартдан бошлаб бир ой муддатга АҚШга ўтади. Fox News телеканалининг қайд этишича, тарихда илк бор АҚШ президентининг рафиқаси ёки умуман бирор бир дунё етакчисининг турмуш ўртоғи Хавфсизлик кенгаши йиғилишига раислик қилади. Мелания Трамп йиғилишда глобал тинчликни таъминлашда таълим ва маърифат тизимининг аҳамияти ҳақида нутқ сўзлаши кутилмоқда.

Муҳим маълумот: 2 март Ўзбекистон учун алоҳида аҳамиятга эга кун — 1992 йилнинг худди шу санасида БМТ Бош Ассамблеясининг 46-сессиясида Ўзбекистон Республикасини ташкилот аъзолигига қабул қилиш тўғрисидаги резолюция бир овоздан маъқулланган. Мелания Трамп БМТ Хавфсизлик кенгашига раислик қиладиган кун (2 март) Ўзбекистоннинг БМТга аъзо бўлганига роппа-роса 34 йил тўлади.