Олмалиқ кон-металлургия комбинатининг «Ковулди олтин саралаш фабрикаси қурилиши» лойиҳаси амалга оширилмоқда.

Қайд этилишича, ушбу фабрика «Ковулди» ва «Қуйи-Кенжасой» конларидан қазиб олинадиган маъданларни қайта ишлашга мўлжалланган. Бу ерда йилига 200 минг тонна хомашёдан қимматбаҳо металлар ажратиб олинади.

Фабриканинг қурилиш ишлари жорий йилнинг февраль ойида бошланган бўлиб, 2025 йил 4-чорагида фойдаланишга топширилиши режалаштирилган. Лойиҳа доирасида ер майдонини тайёрлаш, маъмурий-маиший биноларнинг пойдеворини қуриш ва ишлаб чиқариш биноси учун 54 та темир-бетон колонна ҳамда 530 та тўсиқ ўрнатиш ишлари бажарилган.

Фабрика қурилишининг иккинчи босқичида технологик ускуналар – тегирмонлар, гидроциклонлар ва классификаторлар ўрнатилади.

«Ускуналар Марказий таъмирлаш-механика заводи томонидан маҳаллийлаштириш дастури асосида тайёрланмоқда. Шу кунгача 2 та тегирмон, 2 та гидроциклон ва бошқа эҳтиёт қисмлар тайёрланди.

Эътиборли жиҳати шундаки, мазкур фабрика тўлиқ ОКМКнинг ўз кучи ва мутахассислари томонидан барпо этилмоқда. Қурилишда фойдаланилаётган темир-бетон конструкциялар ҳам комбинатнинг «Олмалиқметаллургқурилиш» трестида ишлаб чиқарилмоқда», – дейилади хабарда.

ОКМКнинг Ангрен ва Чодакдаги фабрикаларидан кейинги учинчи олтин саралаш мажмуаси  бўлиши айтилаётган ушбу фабрика ишга туширилгач, қўшимча 151 та янги иш ўрни яратилиши айтилди.