Ўтган йилнинг кузидан буён Украина-Россия можаросида рус қўшинлари сафида жанг олиб бораётган Шимолий Корея ҳарбийлари ҳақида турли хабарлар тарқалиб келган бўлса-да, на Москва ва на Пхеньян бу борада бирор муносабат билдирмай келаётган эди.

Жорий йил 26 апрель куни Россия армияси Бош штаб бошлиғи Валерий Герасимов Курск вилоятини озод қилиш операцияси якунланганини эълон қилар экан, жанг майдонида Россия ҳарбийлари билан «елкама-елка» ҳаракат қилган КХДР ҳарбийларига илк бор миннатдорчилик билдирди.

Мавзуга доир: «Курск вилоятида 11 минг Шимолий Корея аскари бор» — Зеленский

Ўз навбатида, Шимолий Кореянинг KCNA марказий телеграф агентлиги ҳам мамлакат ҳарбийлари Украина қуролли кучлари томонидан босиб олинган Курск вилоятини озод қилиш бўйича жангларда қатнашгани ҳақида илк марта хабар тарқатди.

Баёнотда айтилишича, КХДР Меҳнат партияси Марказий ҳарбий комиссияси Шимолий Корея армиясининг жанговар бўлинмаларига «ушбу операцияда кўрсатган қаҳрамонликлари учун» юқори баҳо берган.

Шимолий Корея етакчиси Ким Чен Ин буйруғи билан эса Россияга юборилган мамлакат ҳарбийлари шарафига Пхеньянда «КХДР фахрли ўғлонлари қаҳрамонлигини тараннум этувчи ҳарбийлар» ёдгорлиги ўрнатиладиган бўлди.

Мавзуга доир: «Бу бизнинг ишимиз» — Путин биринчи марта КХДР ҳарбийлари масаласида изоҳ берди

ТАССнинг ёзишича, Путин Курск вилоятида украиналик ҳарбийлар гуруҳини мағлуб этишда иштирок этган Корея халқ армияси бўлинмаларига миннатдорчилик билдирган.

«КХДР аскарлари Россияга Украина қуролли кучларининг босқинини қайтаришда халқаро қонунларга тўлиқ риоя қилган ҳолда ёрдам беришди», – деган Путин.