Самарқандда фуқароларга зўрлик ишлатиб улардан пул ундириб келган жиноий гуруҳ қўлга олинди. Бу ҳақда Самарқанд вилояти ИИБ маълум қилди.

Хабарда айтилишича, 22 ёшли йигит Самарқанд вилояти ИИБга ариза билан мурожаат қилиб, Жомбой туманида яшовчи 25-30 ёшлардаги аёл фуқароларнинг ишончига кириб, шаҳвоний уйдирмалар уюштириб, шунинг билан бирга 2-3 нафар спортчи йигитлардан иборат жиноий гуруҳ тузиб, фуқароларни қўрқитиш орқали яланғоч ҳолатдаги тасвирларга туширгани ва улардан товламачилик йўли билан пул талаб қилаётганлигини билдирган.

Мазкур гуруҳ ушбу йигитга нисбатан ҳам «шантаж» уюштириб, ундан ёзган «тилхат»и, ҳайдовчилик гувоҳномаси ва автомашинаси техпаспортини қайтариб олиши эвазига 1500 АҚШ доллари миқдорида пул сўраган.

Аризачи ўз аризасида ушбу шахсларга нисбатан қонуний чора кўришни сўраган.

Мазкур аризага асосан Самарқанд вилоят ИИБ Тезкор қидирув хизмати Жиноят қидирув бошқармаси Уюшган жиноятчиликка қарши курашиш бўлими ходимлари томонидан тезкор тадбир ўтказилди. Тадбирда аёл ҳамда унинг шериклари ушбу йигитдан 1500 АҚШ доллари эвазига унинг қарздорлик «тилхат»и, ҳайдовчилик гувоҳномаси ва техпаспортини қайтариб бераётган вақтда далилий ашёлар билан ушланиб, тегишли тартибда ҳужжатлаштириб олинди.

Аниқланишича, аёлнинг жиноий шериклари спортнинг бир неча турлари билан шуғулланиб келган спортчилар бўлиб, улар бундан ташқари ҳам жуда кўп жиноят ва ҳуқуқбузарликлар содир этган.

Улар бир нечта жиноий қилмишларни ташкил этувчи ҳамда зўравонликни тарғиб қилувчи ҳолатларни, жумладан, туҳмат қилиш, ўзгалар мулкини талон-торож қилиш, товламачилик, талончилик ҳамда ҳужжатларни эгаллаш каби қатор жиноятларни содир этганликда гумонланяпти.

Ҳозирда мазкур шахсларга нисбатан Жиноят кодексининг бир неча моддалари билан жиноят иши қўзғатилиб, тергов ҳаракатлари олиб борилмоқда.