«Sputnik Озарбойжон» агентлиги («Россия сегодня» халқаро ахборот агентлигининг Боку бўлими) офисида полиция томонидан ўтказилган операция давомида қўлга олинганлар бор.

«APA»нинг ёзишича, мамлакат ИИВ томонидан ўтказилган тезкор тадбирда ушбу агентликда ишлаган Россия Федерал хавфсизлик хизматининг (ФСБ) икки ходими қўлга олинган.

Маълумот учун, жорий йилнинг феврал ойида Озарбайжонда Россиянинг «Россия сегодня» халқаро ахборот агентлигининг филиали сифатида фаолият юритувчи «Sputnik Озарбойжон» агентлиги фаолиятини тўхтатиш тўғрисида қарор қабул қилинган эди.

Ушбу қарор Озарбайжон давлат оммавий ахборот воситаларининг хориждаги ва мамлакатдаги хорижий журналистлар фаолиятида тенгликни таъминлаш мақсадида қабул қилингани маълум қилинган.

Яъни, «Sputnik Озарбойжон»нинг Бокуда ишлаётган журналистлари сони AZERTACнинг Россиядаги журналистлари сонига тенг бўлиши керак.

Бироқ, шунга қарамай, агентлик ўз фаолиятини 40 нафар ходим билан давом эттириб келган.

Эслатиб ўтамиз, Озарбойжон ва Россия ўртасидаги муносабатлар 27 июн куни Екатеринбургда озарбойжон миллатига мансуб 50 дан ортиқ шахс қўлга олинганидан сўнг кескинлашди. Қўлга олиш чоғида камида икки киши ҳалок бўлган, бир неча киши жароҳатланган. Боку бу иш бўйича айбдорларни жавобгарликка тортишни талаб қилди, Озарбайжон Ташқи ишлар вазирлиги Россия элчисига норозилик нотаси топширди.

«Озарбойжонликлар яшовчи уйларга уюштирилган рейд оқибатида юртдошларимиз ҳалок бўлгани, айримларининг оғир тан жароҳати олгани, 9 киши ҳибсга олингани муносабати билан чуқур ташвиш билдирамиз. Биз Россиядан ушбу иш бўйича зудлик билан тергов ўтказишни ва мазкур номақбул зўравонлик учун айбдорларни имкон қадар тезроқ жавобгарликка тортишини кутамиз», — дейилади Озарбойжон ТИВ баёнотида.   

Россия ТИВ вакили Мария Захарова эса қўлга олинганлар Россия фуқаролари эканини билдирган.