Қоракўл тумани «Қораҳожи» маҳалласида яшовчи Б. Давронов ўзига тегишли бўлган «ТТЗ 100» трактори кабинасида ов қуролини сақлаб келган.

Бухоро вилоят ИИБ Эксперт-криминалистика бўлимининг судга оид баллистик экспертизаси хулосасига кўра, ушбу қурол «жанговар ўқ отар қуроллар туркумига кирувчи, 16 калибрли ов қуроли патронлари билан отиш учун яроқли бўлган» 1960 йилда «Ижевск механика» қурол заводида ишлаб чиқарилган, 16 калибрли, бир силлиқ милли, «ИжК» моделли, А-20719-рақамли ўқотар ов қуроли экани қайд этилган.

Қонунга хилоф равишда тегишли рухсатномасиз сақлаб ва ундан фойдаланиб келган тракторчининг хатти-ҳаракатлари Қоракўл туман ИИБ ходимлари томонидан ўтказилган тезкор тадбир давомида аниқланган. Ўқотар ов қуроли тегишли тартибда ҳужжатлаштириб олинган.

Судда сўроқ қилинган судланувчи ушбу қуролни отасидан қолган эски молхона биноларини йиқитганида, молхона девори остидан қопга ўралган ҳолда топиб олганини айтган. Кейин ов қуролини оила-аъзолари кўриб қолмаслиги учун ўзининг трактори кабинасида яшириб келаётганини ва бу ҳақда ички ишлар органларига билдирмай келаётганини тан олган.

Жиноят ишлари бўйича Қоракўл тумани суди раиси Бобораҳим Очиловнинг «Xabar.uz»га билдиришича, Бобоёр Давроновга нисбатан Жиноят кодексининг тегишли моддаси билан 2 йилу 6 ой муддатга озодликни чеклаш жазоси тайинланган.

Илгарироқ, айнан қоракўллик тракторчи фермерни отиб қўйган эди.