17-dekabrda sayyoramizning turli nuqtalarida yuz bergan muhim voqea-hodisalar fotosuratlarda.

Yaponiyaning Osaka shahri markazidagi psixiatriya klinikasi to‘rtinchi qavatida yuz bergan yong‘in qurbonlari soni, so‘nggi ma’lumotlarga ko‘ra, 27 nafarga yetdi.

Istanbul birjalari liraning qulashi oqibatida savdolarni to‘xtatdi. Ekspertlar kelgusi yili import narxlari va eng kam ish haqi keskin oshishi oqibatida inflyasiya 1,5 baravarga o‘sishini taxmin qilishyapti.

Turk milliy valyutasi bugun bir nechta tarixiy minimumlarni yangiladi, Toshkent vaqti bilan soat 19:00 ga kelib, sotilish narxi: 1 dollarga nisbatan — 17,07 lira. Lira rivojlanayotgan mamlakatlar valyutalari orasida eng kuchsizi bo‘lib qolmoqda.

266-Rim papasi Fransisk bugun 85 yoshni qarshiladi (1936-yilning 17-dekabrida Argentina poytaxti Buenos-Ayresda tug‘ilgan).

Fort Pikett — AQSh Milliy gvardiyasi tayyorlov markazi. Suratda: bu yerda boshpana topgan afg‘onlar futbol o‘ynashmoqda.

Moskvada Yangi yil transporti yo‘lga qo‘yildi.

Kanzas shtati (AQSh)da o‘rmonlar yonmoqda.

Tornado vayron qilgan Meyfild shahri (AQSh)da yashovchilar mahalliy maktabda ochilgan insonparvarlik taqsimlash markazida.

IMDb 2022-yilning eng kutilayotgan seriallari ro‘yxatini e’lon qildi. «Taxtlar o‘yini»ga olingan prikvel — «Ajdaho uyi» ushbu ro‘yxatning birinchi qatoridan joy oldi. Serialda Targariyenlar sulolasining qulashi va «Ajdaholar raqsi» nomini olgan urushning boshlanishi tasvirlangan.

APL 17-turida «Nyukasl» ustidan 3:1 hisobida g‘alaba qozongan «Liverpul» tarixiy natijaga erishdi. Jamoa matbuot xizmati ma’lumotiga ko‘ra, «Liverpul» Angliya futboli oliy ligasi tarixida 2000 ta o‘yinda zafar quchgan ilk jamoa bo‘ldi.

Ramzau (Avstriya) Tramplindan sakrash bo‘yicha jahon kubogi o‘yinlariga mezbonlik qilmoqda.