18 декабрда сайёрамизнинг турли нуқталарида юз берган муҳим воқеа-ҳодисалар фотосуратларда.

Филиппинда юз берган тайфун оқибатида 33 киши ҳалок бўлди. Синоптиклар тайфун Вьетнам томон йўналиш олганини хабар беришди.

Ҳиндистон ядровий каллакни олиб учишга мўлжалланган янги авлод баллистик ракетаси — «Agni P»ни синовдан муваффақиятли ўтказди. Ракета Бенгал кўрфазидаги Абдул Қалам оролидан учирилган.

Сербияда мамлакатнинг экологик сиёсатига қарши норозилик намойиши бўлиб ўтди. Экофаоллар литий қазиб олинишини тўхтатишни талаб қилишмоқда.

«Толибон» ҳаракати бугун, шанба куни баёнот беришича, Афғонистонда фуқароларга паспорт бериш тикланган. Маълумотларга кўра, ҳозирча олдин ариза топширганларга паспорт берилади. Янги аризаларни қабул қилиш 2022 йилнинг 10 январидан бошланади.

Парижнинг Елисей майдонида Янги йил кечасига бағишланган тадбирлар бекор қилинди. «Омикрон» штамми кенг тарқалишининг олдини олиш мақсадида ушбу қарорга келинган.

Миср коронавирусга қарши эмланмаганларнинг мамлакатга киришига чекловлар жорий этди.

Дунёдаги энг кенг музликда дарзлар пайдо бўлди, 2031 йилга бориб у парчаланиб кетиши мумкин. Ғарбий Антарктидада жойлашган Туэйтс музлиги «Оқ қитъа»даги энг тез ҳаракатланувчи ва нобарқарор музлик. Унинг эриши шу пайтгача Дунё океани сатҳи ўсишининг 4 фоизини таъминлаган.

«Союзмультфильм» «Сеними, шошмай тур!» мультсериали янги талқинининг дастлабки тўрт сериясини тақдим этди.