Токио суди 30 ёшли Такахиро Сираисини тўққиз кишини ўлдиришда айбдор деб топди ва уни ўлимга маҳкум этди, дея хабар берди «Киодо» агентлиги.

Суд қарорига кўра, тиббий кўрик пайтида йигитнинг ақли расолиги тасдиқланди. Бу эса ҳаракатлари учун жавобгар эканлигини англатади. Сираиси шафқатсиз қотилликлардан ташқари, қурбонларининг жасадларини қисмларга ажратишда ва уларнинг қолдиқларини сақлашда ҳам айбдор деб топилди.

Бир ёш йигит томонидан икки ой давомида содир этилган бир қатор ваҳший қотилликлар 2017 йилда бутун Японияни ларзага солди. Ўшанда Сираиси Токио яқинидаги Канагава префектурасидаги Дзама шаҳрида истиқомат қиларди. Жиноятлар тасодифан фош этилгани кенг жамоатчилик норозилигига сабаб бўлди: йўқолган қизнинг укаси унинг паролларини билган ва жиноятчи билан ёзишмаларини кўрган. Хусусан, қиз у билан ўз жонига қасд қилиш масаласини муҳокама қилган ва буни биргаликда амалга оширишни хоҳловчи одамни қидираётганини маълум қилган. Бу полиция жиноятчининг изига тушишига ёрдам берди.

Гумонланувчининг квартираси тинтув қилинганда яна саккиз кишининг боши ва бошқа тана қисмлари топилган. Кўп ўтмай у қотилликни тан олди. Фақат «шу даражада кўп одамни ўлдирганидан, уларнинг кимлигини эслолмаслигини» айтди. Барча қурбонларнинг исмларини аниқлаш учун полиция ДНК-тестини ўтказишига тўғри келди.

Ўлдирилган тўққиз кишининг саккиз нафари Япониянинг турли префектураларидан келган 15 ёшдан 26 ёшгача бўлган қизлар ташкил этади. Тергов натижасида аниқланишича, уларнинг ҳаммаси ҳам ўз жонига қасд қилишни истамаган.

Хавфсиз мамлакатлардан бири сифатида тан олинган Японияда икки ой ичида тўққиз кишининг хуфиёна йўқолиши ва қотил қўлида жон бериши, устига-устак, барча қотилликлар ва жасадларнинг қисмларга ажратилиши оддий бир шаҳар квартирасида содир этилгани ва қўшниларнинг эътиборни жалб қилмагани ҳам кенг жамоатчиликни ҳайратга солмоқда.