Владимир Путин Марказий Осиё учун ҳам, дунё учун ҳам мақбул давлат раҳбари, деб ҳисоблайди Қозоғистон президенти Қосим-Жўмарт Тўқаев. Бу ҳақда у Берлин шаҳрида Германия канцлери Фридрих Мерц билан қўшма матбуот анжуманида гапирди.  

Германиянинг ARD телеканали мухбири Қозоғистон раҳбаридан россиялик ҳамкасби Владимир Путин хусусида қандай фикрда эканини сўраган.

«Президент Путин билан муносабатим аъло даражада. Мен уни кўзга кўринган давлат арбоби деб биламан. Балки фикрим сизга бироз ғалати туюлиши мумкин, лекин бугун ҳам катта ишонч билан айтаманки, президент Путин давлат арбоби, Россия раҳбари сифатида Марказий Осиё, жумладан, Қозоғистон учун, Европа учун, бутун дунё учун мақбул сиёсий фигурадир», — деган Тўқаев.  

Қозоғистон раҳбари фикрича, Путин Россия каби мураккаб тарихга эга йирик давлатни бошқариш учун энг зарур хислатларга, жумладан, стратегик мақсадларга эга.  

Тўқаев Қозоғистонни Россия билан боғловчи табиий, жўғрофий омилларга эътибор қаратган.

«Қозоғистон ва Россия ўртасида 7597 километрлик умумий чегара борлигини унутмаслик керак — бу дунёдаги энг узун чегарадир. Бу мазкур давлат билан дўстона алоқаларни ривожлантириш омили эмасми? Қозоғистон ҳудудида рус миллатига мансуб 2,7 миллион фуқаромиз яшамоқда. Мамлакатимизда православ черкови ҳам кенг миқёсда фаолият юритади ва биз буни ҳурмат қиламиз. Бу каби жиҳатларни эътибордан қочирмаслик керак», — деган у.  

Қозоғистон раҳбари ўз чиқишида Украинада давом этаётган урушни ҳам эслаб, расмий Остона БМТ Низомига асосан барча давлатларнинг ҳудудий яхлитлигини ҳурмат қилишини таъкидлаган.

Аввал хабар берганимиздек, Тўқаев жорий йил июл ойида Омскда ўтган учрашувда Путинга Украина можаросини “музлатиш”ни таклиф этганди.

Тўқаев Берлиндаги матбуот анжуманида ҳам ушбу таклифини яна бир карра ёдга олган.

Марказий Осиё бўйича эксперт Аркадий Дубновнинг ёзишича, Россия ва Қозоғистон матбуоти Германия канцлери Фридрих Мерц Тўқаевнинг Путин ҳақидаги илиқ фикрига жавоб тариқасида Кремлга нисбатан кескин фикр билдирганига эътибор қаратмаётир.

Мерц матбуот анжуманида Россия раҳбариятидан музокара столига ўтиришни талаб қилган.

«Россия бу урушда ғалаба қозонмайди. Қолаверса, Россия улкан зарар кўрмоқда, жумладан, иқтисодий соҳада. Биз ҳозирнинг ўзидаёқ Россия иқтисодиёти қанчалик оғир аҳвол эканини кўриб турибмиз. Урушнинг давом этиши Россияга қимматга тушади», — деган Мерц.

Германия етакчиси нефтни Россия ўрнига Қозоғистондан сотиб олиш режасидан ҳам гап очган.