Дания парламенти кўриб чиқаётган янги қонун лойиҳасига кўра, ўқитувчилар айрим вазиятларда ўқувчиларга нисбатан «жисмоний куч» ишлатишига рухсат берилиши мумкин. Бу ҳақда мамлакат таълим вазири Магнус Хеунике баёнот берди.

Агар қонун қабул қилинса, ўқитувчилар айрим вазиятларда ўқувчиларни жисмоний тўхтатиб қолиш ёки уларни қаршилик қилса ҳам синфдан олиб чиқиб кетиш ҳуқуқига эга бўлади.

Вазир тушунтиришича, бундай чоралар ўқувчилар «ўзи ёки атрофдагилар ҳаётига хавф туғдирган» ёхуд дарс жараёнини «жиддий равишда бузган» ҳоллардагина қўлланилади. Алоҳида таъкидланишича, гап ўқувчиларни калтаклаш ёки жисмоний жазолаш ҳақида кетмаяпти.

«Вазият кескинлашганда нима қилиш кераклиги ҳақида ўқитувчиларда ҳеч қандай шубҳа қолмаслиги керак. Зўравонликнинг олдини олгани учун ишдан бўшаб кетишдан қўрқадиган бирорта ҳам педагог бўлмаслиги шарт», — деди вазир.

Ушбу қонун лойиҳасининг ишлаб чиқилишига мамлакат мактабларида ўқувчилар ўртасида тажовузкорлик ва тартиббузарлик ҳолатлари кўпайиб бораётгани сабаб бўлган.

Дания меҳнат инспекцияси ўтказган сўровномада қатнашган педагогларнинг тўртдан бир қисмидан кўпроғи сўнгги пайтларда болаларнинг бебошликларига тез-тез дуч келаётганини билдирган. Деярли ҳар бешта синфдан биттасида ўқитувчиларга нисбатан зўравонлик ҳолатлари кузатилмоқда.