Савол: Мен карантин сабабли ишдан бўшашга мажбур бўлдим. Яъни, иш берувчи билан келиша олмадим. Ишсизлик нафақаси олсам бўладими? Ишсизлик нафақасини олиш учун қаерга мурожаат қилишим керак?

Саволга Адлия вазирлиги Жамоатчилик билан алоқалар бўлими бошлиғи Севара Ўринбоева жавоб берди:

Ўзбекистон Республикаси Мехнат кодексига мувофиқ, ишдан маҳрум бўлган, биринчи марта иш қидираётган, шунингдек узоқ (бир йилдан ортиқ) танаффусдан кейин меҳнат фаолиятини қайта бошлашни истаган ва ишсиз деб эътироф этилган шахсларга:

• ишсизлик нафақаси тўлаш;
• қарамоғидагиларни ҳисобга олган ҳолда моддий ёрдам бериш;
• касб ўрганиш, малака ошириш ёки қайта тайёрлаш даврида стипендия тўланиши ҳамда шу даврни меҳнат стажига қўшиш;
• ҳақ тўланадиган жамоат ишларида қатнашиш имконияти таъминланади.

Шунингдек, ишсизлик нафақаси ишсиз деб эътироф этилган шахсга у иш қидираётган шахс сифатида маҳаллий меҳнат органида рўйхатдан ўтган кундан эътиборан тайинланади. Қарамоғида учтагача киши бўлган, ўттиз беш ёшга тўлмаган ишсиз эркакка ишсизлик нафақаси у ҳақ тўланадиган жамоат ишларида Ўзбекистон Республикаси Вазирлар Маҳкамаси томонидан белгиланадиган тартибда иштирок этган тақдирда тайинланади. Ишсиз шахснинг нафақа олиш ҳуқуқи у иш қидираётган шахс сифатида рўйхатдан ўтган пайтдан бошлаб кечи билан ўн биринчи кундан эътиборан кучга киради.

Амалдаги қонунчиликка кўра ишсизлик нафақаси кўпи билан:

• ишдан ва иш ҳақидан (меҳнат даромадидан) маҳрум бўлган ёки узоқ (бир йилдан ортиқ) танаффусдан кейин меҳнат фаолиятини қайта бошлашга ҳаракат қилаётган шахсга ўн икки ойлик давр мобайнида йигирма олти календарь ҳафта;
• илгари ишламаган ва биринчи марта иш қидираётган шахсга эса ўн уч календарь ҳафта мобайнида тўланади.

Шунга кўра ҳудудий бандлик ва меҳнат муносабатлари бўйича органга мурожаат қилишингиз лозим.