Президент Шавкат Мирзиёев ёшлар билан учрашувда касб-ҳунар ўрганишни қўллаб-қувватлашга қаратилган қатор янги ташаббусларни эълон қилди.

Давлат раҳбарига кўра, энди қўлида касби бўлиб, халқаро талаблар асосида янги кўникмаларни эгаллаш истагида бўлган ёшларга фоизсиз ссуда шаклида «касб ваучери» берилади. Ҳар йили 50 минг нафар ёшнинг замонавий касбларни ўрганиш харажатлари шу тизим орқали қоплаб берилади.

Шунингдек, эҳтиёжманд оилалардаги 85 минг нафар ишсиз ёш хусусий ўқув марказларида касб эгаллаши учун бепул ваучерлар билан таъминланади. Жорий йилнинг ўзида «касб ваучери» ва бепул ваучер тизимини молиялаштириш учун 120 миллиард сўм ажратилади. Заруратга қараб, ушбу маблағ ҳажми яна оширилиши белгиланди.

Президент хорижий тил бўйича юқори натижага эришган ёшларни қўллаб-қувватлаш тажрибаси ўзини оқлаганини таъкидлаб, халқаро касб сертификатини олган ёшларга ҳам ушбу харажатларни қоплаш тизимини татбиқ этишни таклиф қилди.

Йиғилишда техникумлар фаолиятини такомиллаштириш масаласига ҳам алоҳида эътибор қаратилди. Янги ўқув йилидан хусусий техникумларга касбга ўқитиш бўйича давлат грантлари ажратилади. Шунингдек, техникум очиш учун лицензия талаблари соддалаштирилиб, 20 дан ортиқ шарт бекор қилинади.

Бундан ташқари, халқаро касб танловларида ғолиб бўлган давлат ва хусусий техникум ўқувчилари 100 миллион сўмдан, уларни тайёрлаган устозлар эса 50 миллион сўмдан пул мукофоти билан тақдирланади.