«S&P Global Ratings» халқаро агентлиги Ўзбекистон Республикаси Ташқи иқтисодий фаолият миллий банкининг рейтинг прогнозини «барқарор»дан «ижобий»га кўтарди ҳамда банкнинг узоқ ва қисқа муддатли кредит рейтингларини BB-/B даражасида тасдиқлади. Ушбу ютуқ банкнинг барқарор ривожланаётгани ва мамлакатимиз иқтисодиётида стратегик роль ўйнаётганини кўрсатади.

Таъкидлаш жоизки, ушбу ўзгариш Ўзбекистоннинг суверен рейтинги прогнозининг ўзгаришидан сўнг амалга ошди. «S&P» агентлиги мамлакатда кузатилаётган ижобий макроиқтисодий тенденциялар, кенг қамровли ислоҳотларнинг изчил амалга оширилаётгани ва инвесторлар ишончининг ортиб бораётганини юқори баҳолади. Ана шундай шароитда «Ўзмиллийбанк» АЖ ўз фаолиятида барқарорлик ва самарали бошқарувни намоён этиб, мамлакат молия тизимида муҳим ўрин тутишда давом этмоқда.

«Банк диверсификацияланган бизнес модели, давлат томонидан қўллаб-қувватланиши ҳамда барқарор капитализациясига таянган ҳолда молия бозорида ўзининг етакчи позицияларини сақлаб қолмоқда», — дейилади S&P ҳисоботида.

Прогноз ошишига таъсир қилган асосий омиллар:

- Барқарор ривожланиш ва бозордаги етакчилик. «Ўзмиллийбанк» АЖ иқтисодиётни молиялаштиришда фаол иштирок этиш ҳамда хавфларни самарали бошқариш борасида мувозанатни сақлаш орқали ривожланиш стратегиясини муваффақиятли амалга оширмоқда.

- Инвесторлар ишончининг ортиши. Банкнинг давлат томонидан қўллаб-қувватланиши ҳамда барқарор молиялаштириш профили уни халқаро молия институтлари учун ишончли ва жозибадор ҳамкорга айлантирмоқда.

- Молиявий барқарорлик. «S&P» халқаро агентлиги капитал ва ликвидликнинг етарли даражада эканлигини, шунингдек, банкнинг тартибга солиш соҳасидаги ўзгаришларга мослашувчанлигини эътироф этди.

Истиқболлар

С&П агентлигининг прогнозига кўра, келгуси 12 ой мобайнида «Ўзмиллийбанк» АЖ ўзининг барқарор позицияларини сақлаб қолиши ва банк секторида давом этаётган трансформация жараёнларидан фойда кўриши кутилмоқда. Агар мамлакатнинг суверен позициялари янада мустаҳкамланса, банк рейтинги ошиши мумкин.

«Ижобий прогноз Ўзмиллийбанкнинг бизнес обрўсининг мустаҳкамланаётгани ва унинг Ўзбекистон молия тизимидаги таянч банк сифатидаги роли ортиб бораётганини кўрсатади», — дейилади агентлик баёнотида.

«С&П» агентлиги Ўзмиллийбанкнинг барқарор фаолият олиб бораётгани, давлат билан яқиндан ҳамкорлик қилаётгани ҳамда диверсификацияланган бизнес-моделга эга эканлигини алоҳида таъкидлади. Банк капитал ва ликвидликнинг етарли даражасини сақлаб, молиялаштиришда барқарорлик ва хилма-хилликни намоён этмоқда.

2024 йил якунлари бўйича банк Ўзбекистоннинг энг йирик солиқ тўловчилари ўнталигига киргани унинг фаолияти самарали эканлигининг яна бир исботидир. Ўзмиллийбанк мамлакат бюджетига 1,5 трлн сўмдан ортиқ маблағ ўтказиб, миллий рейтингда 8-ўринни эгаллади. Бу ўтган йилга нисбатан 48 фоизга кўпдир. Мазкур кўрсаткич банк мамлакат ривожланишида муҳим ижтимоий-иқтисодий аҳамиятга эга эканлигидан далолат беради.

Ўтган йил якунларига кўра, банкнинг:

• жами капитали 8,4 фоизга ошиб, 1,6 млрд АҚШ долларига етди;

• активлари 8,1 фоизга ўсиб, 10,5 млрд АҚШ долларига етди;

• кредит портфели 8 фоизга 8,7 млрд АҚШ долларига ошди.

Соф фойда 133 млн АҚШ долларини ташкил этди ва бу кўрсаткич бўйича Ўзбекистон банклари орасида етакчи ўринни эгаллади.

2024 йилда банк энергетика, тиббиёт, транспорт, фарматсевтика каби соҳаларда умумий қиймати 1,5 млрд АҚШ долларига тенг жами 286 та муҳим лойиҳани молиялаштирди.

«S&P» халқаро агентлиги Ўзмиллийбанк кредит рейтинги прогнозини «барқарор»дан «ижобий»га ўзгартиргани халқаро инвесторлар учун катта «сигнал» бўлди. Ушбу ютуқ банкнинг барқарор молиявий ва операцион моделига берилган юксак баҳо, унинг стратегик аҳамияти ҳамда кенг кўламли ислоҳотларни муваффақиятли амалга ошираётганини акс эттиради. Инвесторларнинг ишончи тобора ортаётгани банкнинг ишончли ва очиқ ҳамкор сифатидаги инвестициявий жозибадорлигини ошириб, халқаро капитал бозорларига чиқиш ва узоқ муддатли молиялаштиришни кенгайтириш учун янги имкониятларни очади. Ўзмиллийбанк Ўзбекистон иқтисодиётига инвестициялар жалб қилишда асосий молиявий институтлардан бири бўлиб, устувор тармоқларни фаол қўллаб-қувватлаш ҳамда стратегик шериклик учун барқарор платформани шакллантирмоқда.