АҚШ президенти Доналд Трамп Россия Федерацияси Хавфсизлик кенгаши раиси ўринбосари, мамлакат собиқ президенти Дмитрий Медведевнинг Эронга жанговар ядро комплектлари берилишига доир баёнотига муносабат билдирди.

“Россия собиқ президенти Медведев “N” сўзини (nuclear, яъни ядро қуроли назарда тутилмоқда – таҳр.) эҳтиётсизлик билан қўллагани, у ва бошқа мамлакатлар Эронга ядро каллакларини етказишга тайёр экани ҳақида айтгани тўғрими? У чиндан ҳам шундай дедими ёки менга шундай туюлдими? Агар у шундай деган бўлса, бу чиндан ҳам тасдиқланса, илтимос, бу ҳақда менга зудлик билан хабар беринглар. “N” сўзига бундай эҳтиётсизлик билан муносабатда бўлиш ярамайди. Ўйлайманки, айнан шунинг учун ҳам Путин “босс”дир”, – деб ёзди Трамп ўзи асос солган Truth Social тармоғида.

Эътиборга молик жиҳати, ядро қуроли ҳақида эҳтиётсизлик билан баёнотлар бериш оқибатидан огоҳлантирган Трампнинг ўзи пости давомида АҚШ сувости атом кемалари, жумладан, “дунёдаги энг кучли ва ажалвор қурол”га эга эканини писанда қилган.

Аввал хабар берганимиздек, РФ Хавфсизлик кенгаши раиси ўринбосари Дмитрий Медведев 22 июнь куни Телеграмдаги саҳифасида дунёнинг бир қатор мамлакатлари Эронга жанговар ядро комплектларини беришга тайёр экани ҳақида шов-шувли пост қолдирганди.

АҚШнинг Эронга қарши ҳаво ҳужумларига муносабат тарзида баёнот берган Россия собиқ президенти ўз постида айнан қайси давлатлар, қандай шартларга кўра Теҳронга ядро каллакларини тақдим этмоқчи эканига ойдинлик киритмаган.

Дарвоқе, Трампнинг сўнгги баёнотига жавоб қайтарган Медведев Москванинг Теҳронга оммавий қирғин қуроли беришини истисно этган.

“Россия Эронга ядро қуролини етказиш ниятида эмас. Негаки, Исроилдан фарқли ўлароқ, биз Ядро қуролини тарқатмаслик тўғрисидаги Шартнома иштирокчисимиз”, – деб таъкидлаган Д.Медведев.