Туркиянинг Мугла вилояти Бодрум шаҳрида 25 ёшли Украина фуқароси ўлик ҳолда топилди. Бу ҳақда «Milliyet» нашри хабар берди.

Газетанинг ёзишича, жасад 2 январь куни аёл ижарага олган вилладан топилган. Шу билан бирга, украиналик аёл стулга кишанланган бўлган. Қайд этилишича, мурда топилишидан бир неча кун олдин аёлнинг жони узилган бўлган.

Полициянинг аниқлашича, украиналик аёл 31 декабрь куни таомга буюртма берган ва шундан сўнг уйдан чиқмаган. Қизи билан боғлана олмагач онаси Туркиянинг ҳуқуқ-тартибот идораларига мурожаат қилди.

Ҳозирги вақтда аёл ўлимининг асосий сабаби ўз жонига қасд қилиш ҳисобланмоқда. Полиция маълумотларига кўра, вилладаги учта эшик ҳам ичкаридан қулфланган, уйнинг деразаларига эса темир панжаралар ўрнатилган. Шу сабабли у ерга ташқаридан киришнинг иложи йўқ. Устига-устак, ҳодиса содир бўлган жойда топилган далилларга кўра марҳум ўз жонига қасд қилган бўлиши мумкин.

«Milliyet» нашрининг ёзишича, аёл узоқ вақт давомида кучли бош оғриғидан қийналган ва даволаниш учун тез-тез Украинага бориб турган.