Тайванга эгалик қилиш масаласи Хитой Халқ Республикаси ва Aмерика Қўшма Штатлари ўртасидаги муносабатларда Вашингтон кесиб ўтмаслиги керак бўлган «қизил чизиқ»дир.

Бу ҳақда Хитой ташқи ишлар вазирлиги расмий вакили Мао Нинг маълум қилган.

«Тайван масаласи Хитойнинг асосий манфаатларидан энг муҳими ва Хитой-AҚШ муносабатларидаги биринчи қизил чизиқ бўлиб, уни кесиб ўтмаслик керак», деди у.

Дипломатнинг таъкидлашича, Қўшма Штатлар Тайвандаги сайловларга аралашишга йўл қўйилмаслиги ҳақида шошилинч баёнотлар бермоқда. Мао Нингнинг сўзларига кўра, Хитой томони бундан кескин норозилигини билдиради ва бунга қатъий қаршилик кўрсатади.

Aввалроқ Reuters агентлиги AҚШ президенти Жо Байден маъмуриятининг юқори мартабали ходимига таяниб, Қўшма Штатлар Хитойга Тайванда бўлиб ўтадиган президентлик ва парламент сайловларига ҳар қандай аралашув ёки таъсирга қарши эканлиги ҳақида аниқ сигнал юборганини хабар қилганди.

Шунингдек Хитой АҚШни Тайванга қурол сотишда айблаб, норозилик билдирганди.