Андроид қурилмалар учун Xabar.uz мобил иловаси. Юклаб олиш ×

17 Март, 2019

МИБ ўзининг «мажбурий» мақомидан айрилиши мумкин

Инсайдер 17/03, 12:29 0 13446

Сўнгги вақтларда Мажбурий ижро бюроси ҳақида янграётган кўплаб фикрлар, эътирозлар, танқидлар ортидан, ниҳоят, бу хизмат фаолияти қайта кўриб чиқиладиганга ўхшайди.

«Xabar.uz»да эълон қилинган мақолаларнинг бирида Ўзбекистон тарихида МИБ мисолида мисли кўрилмаган воқелик — прокуратуранинг қонуний тижорийлашуви жараёнини бошимиздан кечираётганимиз ҳақида мулоҳаза юритилганди. Унда МИБнинг вазифаси мажбурият эмас, аслида хизмат экани эслатилганди.


Мавзуга оид: МИБ: «Қарзингиз бўлса нохуш вазиятга тайёр туринг...»


Ўзи аввал бошданоқ бу ташкилотнинг прокуратура тизимида бўлиши турли баҳсларга сабаб бўлаётган эди. Давлатнинг жазоловчи механизмига айланиб қолиши, албатта, унинг обрўсини оширмайди.

МИБ Адлия вазирлиги ҳузурида ёки алоҳида мустақил ташкилот сифатида, ҳеч бўлмаганида, Уй-жой коммунал хизмат кўрсатиш вазирлиги қошида ташкил этилиши кераклиги таклиф қилинганди.

«Xabar.uz»нинг манбаси хабар беришича, яқин вақт ичида Мажбурий ижро бюроси фаолияти қайта кўриб чиқилиши кутилмоқда.

Маълум бўлишича, ҳозирда бир неча вариант кўриб чиқилмоқда ва улардан бири танланиши мумкин:

  1. МИБ Бош прокуратура ҳузурида қолади ва унинг номидаги «мажбурий» сўзи олиб ташланиб, бюрога айлантирилади.
  2. МИБни алоҳида мустақил ташкилот сифатида йўлга қўйиш масаласи кўриб чиқилади.
  3. МИБ Бош прокуратура таркибидан чиқарилиб, Адлия вазирлиги ҳузурида фаолият олиб борувчи хизматга айлантирилади.

Шунингдек, бюро таркиби катта қисқартиришларга тушиши ҳам айтилмоқда.

Аввалроқ, мажбурий ижро бюроси қошидаги «Электрон онлайн-аукционларни ташкил қилиш маркази» давлат унитар корхонаси Ўзбекистон Республикаси Давлат активларини бошқариш агентлиги тасарруфига ўтказилганди.

Куни кеча эса, Президент фармони билан Ўзбекистон прокуратура органлари тизимида айрим лавозим (жумладан, Бош прокурор ўринбосари лавозимларининг иккита штат бирлиги) ва бошқармалар тугатилди, Агросаноат инспекцияси Бош прокуратурадан Вазирлар Маҳкамасига ўтказилди. Мазкур ҳужжатдан прокуратура органларида кадрлар сиёсатини қайта кўриб чиқиш, тизимни ўз лавозимига нолойиқ, профессионал ва ахлоқий талабларга жавоб бермайдиган ходимлардан тозалашга доир вазифалар ҳам ўрин олди.


Мавзуга оид: Қонундаги бўшлиқми бу ёки «Острогорский-мострогорский»лардан қолган мерос?


Бу ўзгаришлар нимани англатади?

Президент Шавкат Мирзиёев мамлакатда инсон манфаатлари, тадбиркорлик фаолиятини ҳимоя қилиш масалаларига деярли ҳар бир чиқишида алоҳида тўхталади, ҳуқуқ-тартибот идоралари ходимлари томонидан инсон ҳуқуқларининг поймол этилиши каби ҳолатлар учраб турганини кескин танқид қилиб келади. Бу борада вазият сезиларли даражада ўзгарди. Халқаро ҳамжамият Ўзбекистон ҳукуматининг ушбу қадамларини олқишламоқда.

Бу йўналишда президент томонидан белгилаб берилаётган чора-тадбирлар инсон манфаатлари йўлида олиб борилаётган ислоҳотлар ҳамон давом этаётганини ва олдинда бизни жиддий ўзгаришлар кутиб турганини билдиради.

19 Феврал, 2019

Шавкат Мирзиёев Сирдарёга учиб кетди

Сиёсат 19/02, 10:08 0 3223

Президент Шавкат Мирзиёев бугун 19 февраль куни ҳудудларда амалга оширилаётган ислоҳотлар, бунёдкорлик ишлари, йирик лойиҳалар билан танишиш ва халқ билан мулоқот қилиш мақсадида Сирдарё вилоятига ташриф буюради.

«Xabar.uz» манбасининг хабар беришича, президент Сирдарёга вертолётда учиб кетган.

Эслатиб ўтамиз, давлат раҳбарининг охирги сафари Жиззах вилоятига бўлганди.

01 Феврал, 2019

ЎзМАА Президент администрацияси таркибига киритилади. Комил Алламжоновнинг мақоми оширилади

Инсайдер 01/02, 20:58 0 3174

Айтишларича, Президент Шавкат Мирзиёев бугун Ўзбекистон матбуот ва ахборот агентлиги фаолиятини такомиллаштириш тўғрисидаги фармон ва қарорни имзолаган. Бу ҳақда телеграмдаги «davletovuz» канали хабар берди.

Унга кўра, Ўзбекистон матбуот ва ахборот агентлиги Ўзбекистон Республикаси Президенти Админстрацияси ҳузуридаги Ахборот ва оммавий коммуникациялар агентлигига айлантирилган. Агентлик директори эса лавозим бўйича давлат раҳбари маслаҳатчиси биринчи ўринбосарига тенглаштирилган.

Шундай қилиб, агентлик ҳукумат таркибидан чиқарилган ҳамда давлат ахборот сиёсатини ишлаб чиқиш ва амалга оширишдаги ваколатли органга айлантирилган. Оммавий ахборот воситаларини ривожлантириш, вазирлик ва идоралар матбуот хизматлари фаолиятини яхшилаш ҳамда давлат органлари очиқлигини таъминлаш унинг асосий вазифалари ҳисобланади.

Бундан келиб чиқадики, давлат ахборот соҳасини ислоҳ қилишни бошлаган. Бу ислоҳотга эса Президентнинг собиқ матбуот котиби К.Алламжонов масъул бўлади.

31 Январ, 2019

Хоразмда яна бир суд ходими пора билан қўлга олинган

Инсайдер 31/01, 18:48 0 2940

Хабарларга қараганда жиноят ишлари бўйича Урганч туман суди судья ёрдамчиси пора билан қўлга тушган. Пора миқдори катта  эмас: икки юз эллик минг сўм!

«Xabar.uz» манбасига кўра, судья ёрдамчиси шу пул эвасига бир фуқаронинг маъмурий суддаги «иши»ни ижобий ҳал этишга ваъда берган. Бироқ...

Мазкур воқелик юзасидан ваколатли органлар томонидан ҳозирча ҳеч қандай маълумот берилгани йўқ.

Эслатиб ўтамиз, яқинда фуқаролик ишлари бўйича Урганч туманлараро судининг судьяси 12 минг АҚШ долларини пора тариқасида олаётганда қўлга тушган эди.

28 Январ, 2019

Инсайдер: Ҳукумат таркиби ва вазирликларда қатор ўзгаришлар юз бермоқда

Инсайдер 28/01, 10:38 0 4146

Айтишларича, мамлакатда «ихчам Ҳукумат»ни шакллантириш бўйича саъй-ҳаракатлар бошланган. Шу кунларда ҳукумат таркибида, шунингдек, марказий вазирлик ҳамда идоралар раҳбариятида қатор ўзгаришлар юз бериши кутилмоқда. Бу ҳақда телеграмдаги «davletovuz» канали хабар тарқатди.

Унга кўра, Ўзбекистон Республикаси Президенти маслаҳатчиси ўринбосари Элёр Ғаниев Бош вазирнинг инвестициялар ва ташқи иқтисодий алоқалар масалалари бўйича ўринбосари этиб тайинланган.

Суҳроб Холмуродов

Ўзбекистон Республикаси Бош вазирининг ўринбосари — Ўзбекистон Республикаси Инвестициялар бўйича давлат қўмитаси раиси Суҳроб Холмуродов эгаллаб турган лавозимидан озод қилинган. У бошқа лавозимга ўтказилган.

Баҳодир Юсупов.

Қишлоқ хўжалиги вазири Баҳодир Юсупов ҳам лавозимидан озод қилинган.

Жамшид Хўжаев.

Ташқи савдо вазири Жамшид Хўжаев қишлоқ хўжалиги вазири этиб тайинланган.

Сардор Умурзоқов.

Инвестициялар бўйича давлат қўмитаси ва Ташқи савдо вазирлиги қўшилиб, ягона вазирликка айлантирилган. Инвестициялар ва ташқи савдо (вазирлик номига аниқлик киритилади) вазири этиб «Ўзчармсаноат» уюшмаси раиси Сардор Умурзоқов тайинланган. Суннатулла Бекенов, Лазиз Қудратов, Шуҳрат Вафоев, Бадриддин Абидов янги вазирга ўринбосар бўлган.

Ҳозирча бу хабарлар расмий тасдиқлангани йўқ. Ушбу тайинловларга яқин вақт ичида аниқлик киритамиз.

02 Ноябр, 2018

Бош прокурорга янги ўринбосар тайинланди

Инсайдер 02/11, 20:29 0 5632

Рашид Насруллаевич Раҳматов Ўзбекистон Республикаси Бош прокурорининг қишлоқ хўжалиги бўйича ўринбосари лавозимига тайинланди. Бу ҳақда «Xabar.uz» манбаси хабар бермоқда.

Рашид Раҳматов бунга қадар Қорақалпоғистон Республикаси прокурори лавозимида ишлаб келаётган эди.

01 Ноябр, 2018

Ҳукумат ис газидан ўлимлар сони ортаётганидан ташвишда. Очилбой Раматов бошчилигида комиссия тузилди

Жамият 01/11, 20:37 0 4962

31 октябрь куни Тошкент шаҳрининг Чилонзор туманида ис газидан заҳарланиш оқибатида бир оиланинг тўрт фарзанди ҳалок бўлди. 28 октябрь куни Риштон туманида икки киши ис газидан заҳарланиб вафот этди.

Сўнгги вақтларда ис газидан заҳарланиш оқибатида бу каби фожиали ҳолатлар кўп кузатилмоқда. «Xabar.uz»нинг ҳукуматдаги манбаси хабар беришича, бугун, 1 ноябрь куни бош вазир томонидан ўтказилган селектор йиғилишида ушбу масалага ҳам тўхталиб ўтилган.

Ҳукумат топшириғига биноан, бош вазир ўринбосари Очилбой Раматов бошчилигида шахсий уйларда иситиш печлари ва иситиш тизимларини текшириш ва назорат қилиш бўйича ҳукумат комиссияси тузилган. Шунга мос равишда вилоят ва туманларда ҳам намунавий кўринишда комиссиялар тузилиши вазифаси ҳам топширилган.

12 Июл, 2018

Самарқандда ҳоким алмашгани ростми?

Жамият 12/07, 10:37 0 9295

Кеча, 11 июль куни қатор интернет нашрлари ва ижтимоий тармоқларда Самарқанд вилояти ҳокими ва унинг икки ўринбосари, шаҳар ҳокими ва унинг қурилиш ишлари бўйича ўринбосари ишдан  кетгани ва ҳатто ҳибсга олингани ҳақида маълумотлар тарқалди.

Самарқанд шаҳридаги қурилиш ишларига ер ажратилиши, аниқроғи, ҳокимият раҳбарияти пора эвазига қурилиш компанияларининг қурилиш қилишига рухсат бераётгани сабаб бундай чоралар кўрилгани маълум қилинди. Ҳатто шаҳар марказида турар-жой мажмуасини қураётган ширкатларнинг мутасаддилари мамлакатдан қочиб чиқиб кетгани айтилди. Албатта бу хабарлар расман тасдиқланмади.

«Дарё» нашри олиб борган суриштирувларига кўра, ҳоким ва унинг ўринбосарлари қўлга олингани ҳақидаги хабарлар ўз тасдиғини топмаган.

Самарқанд шаҳар ҳокимлиги матбуот хизмати ҳам ҳоким ва унинг ўринбосарлари қўлга олинганини рад этган. Хабарларда ҳибсга олингани айтилган Самарқанд шаҳар ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Бобур Элмуродов «Дарё» мухбири билан учрашган. Элмуродов ўз ишини давом эттираётгани ва фуқароларни қабул қилаётгани айтилади.

Самарқанд вилояти ИИБ матбуот хизмати ҳам ҳоким ва унинг ўринбосарлари қўлга олингани бўйича ҳеч қандай маълумот келиб тушмаганини таъкидлаган.

Самарқанд шаҳри ҳокими ва унинг ўринбосарлари қамалгани ҳақидаги хабарни биринчи бўлиб чоп этган нашр эса ушбу янгиликни сайтдан ўчириб ташлаган.

Аммо бугун, 12 июль куни навбатдаги хабарлар тарқалди. Айтишларича, Сурхондарё вилояти ҳокими Самарқанд вилоятига, Сурхондарё вилоятига Тошкент вилояти прокурори ҳоким этиб тайинланган. Бу хабарлар ҳам ҳали расман тасдиғини топгани йўқ.

Воқеалар ривожини кузатишда ва маълумотларни аниқлаштиришда давом этамиз. Бизни кузатиб боринг.

18 Май, 2018

Тошкент шаҳар ҳокимлиги янги бинога кўчмоқда

Жамият 18/05, 22:11 0 8544

Яқин кунларда Тошкент шаҳар ҳокимлиги янги бинога кўчиб ўтиши режалаштирилган. Бу ҳақда «Xabar.uz» манбаси хабар берди.

Маълумотларга кўра, ҳокимлик шаҳардаги Ислом Каримов кўчасига кўчиши режалаштирилган. Бу кўчада ҳозир янги мегаполис — «Tashkent city» халқаро бизнес маркази қурилиши жадал суръатларда давом этмоқда.

Эслатиб ўтамиз, 2018 йил 26 апрель куни Тошкент шаҳар ҳокимлигида Бош вазир Абдулла Арипов иштирокида навбатдан ташқари бўлиб ўтган 35-сессияда Тошкент шаҳар ҳокими лавозимига Жаҳонгир Ортиқхўжаев номзоди бир овоздан тасдиқланган эди.

28 Апрел, 2018

Ўзбекистонда Қандолатчиликни ривожлантириш уюшмаси ташкил этилди

Иқтисодиёт 28/04, 00:07 0 4382

Юртимизда қандолатчилик соҳасини янада ривожлантириш ва бу соҳадаги ишлаб чиқарувчиларни қўллаб-қувватлаш мақсадида янги замонавий ёндашувларга асосланган Қандолатчиликни ривожлантириш уюшмаси ташкил этилди.

«Xabar.uz»га маълум қилинишича, ушбу уюшма барча қандолат маҳсулотлари билан фаолият юритувчи ҳамюртларимизга кўмаклашиш, рағбатлантириш ва уларнинг экспорт салоҳиятини ошириш учун хизмат қилади.

Уюшма раҳбари этиб Мухтор Мансурхаджаевич Умаров тайинланган.

25 Январ, 2018

Ўзбекистон футбол федерациясининг номи ўзгарди

Спорт 25/01/2018 0 5006

Бугун, 25 январь куни Ўзбекистон футбол федерациясининг навбатдан ташқари ҳисобот-сайлов конференцияси бўлиб ўтиши ҳақида хабар берган эдик.

Навбатдан ташқари ҳисобот-сайлов конференцияси деярли бир ярим соатлик кечикиш билан бошланди. Бу ҳақда тадбирда қатнашаётган «Xabar.uz» ахборот-таҳлилий порталининг махсус мухбири хабар берди.

Конференция ЎФФнинг ўтган ойлардаги фаолияти билан боғлиқ видеоролик намойиши билан бошланди. Қайд этилишича, Ўзбекистон футбол федерацияси энди Ўзбекистон футбол ассоциацияси деб номланади.

Эслатиб ўтамиз, ушбу конференцияда ЎФФ президенти Умид Аҳмаджонов истеъфога чиқиб, ўрнига бошқа раҳбар сайланиши кутилмоқда.

ЎФФ конференцияси: бугун федерацияга янги президент сайланади

Спорт 25/01/2018 0 4060

Бугун, 25 январь куни Ўзбекистон футбол федерациясининг навбатдан ташқари ҳисобот-сайлов конференцияси бўлиб ўтади. Унда федерацияга янги раҳбар сайланиши кутилмоқда.

Айни пайтда конференция делегатлари ва иштирокчилари ўз ўрнини эгалламоқда. «Xabar.uz» ахборот-таҳлилий порталининг махсус мухбири ушбу тадбирда иштирок этмоқда.

Мухбиримизнинг хабар беришича, бугунги конференцияда Умид Аҳмаджонов ўрнига Бош вазирнинг биринчи ўринбосари Очилбой Раматов сайланиши кутилмоқда. Бу ҳақда кейинроқ расман хабар берамиз.

Эслатиб ўтиш керак, кеча «Халқ сўзи online» нашрига интервью берган ЎФФ президенти Умид Аҳмаджонов федерациядаги раҳбарлик ваколатини топширишини айтган эди.

17 Январ, 2018

Ислом Каримовнинг Қашқадарёдаги ҳайкали қачон очилиши маълум

Сиёсат 17/01/2018 0 4400

Аввал хабар берганимиздек, айни дамда Ўзбекистон Президенти Шавкат Мирзиёев раислигида видеоселектор йиғилиши бўлиб ўтмоқда. Унда «Xabar.uz» ахборот-таҳлилий порталининг мухбири ҳам қатнашмоқда.

Йиғилишда Бош вазир Абдулла Ариповнинг маълум қилишича, Қашқадарё вилоятида Ўзбекистоннинг Биринчи Президенти Ислом Каримовнинг ҳайкали ўрнатилади. Қарши шаҳри марказига ўрнатилаётган ҳайкал шу йилнинг 24 январида очилиши режалаштирилмоқда.

Йиғилишда Қашқадарё вилоятининг ҳокими Зафар Рўзиев ҳам сўзга чиққан. «Ўзидан аввалги раҳбарнинг номини сақлаш, обрўсини кўтариш фақат мард раҳбарларнинг қўлидан келади. Бу — менинг эмас, халқимизнинг фикри. Ҳамма ҳам бунга қодир эмас», — деб айтган вилоят ҳокими.

«Тадбирни юқори савияда ўтказиш керак. Ўзим юбилейдан икки кун олдин бориб уни кўраман», — деди давлат раҳбари йиғилишда.

Шавкат Мирзиёев ҳафта охирида Сурхондарёга боради

Сиёсат 17/01/2018 0 3964

Аввал хабар берганимиздек, айни дамда Ўзбекистон Президенти Шавкат Мирзиёев раислигида видеоселектор йиғилиши бўлиб ўтмоқда. Унда «Xabar.uz» ахборот-таҳлилий порталининг мухбири ҳам қатнашмоқда.

Унинг маълумот беришича, жорий йилнинг 19 январь куни Шавкат Мирзиёев жойларда амалга оширилаётган бунёдкорлик ишлари ва халқнинг аҳволи билан яқиндан танишиш мақсадида Сурхондарё вилоятига ташриф буюради.

16 Январ, 2018

Айтишларича, «Тангем» Ўзбекистоннинг Жанубий Кореядаги сайёҳлик элчиси сифатида фаолият юритади

Маданият 16/01/2018 0 4526

Ўзбекистон Президенти Шавкат Мирзиёев ўтган йилнинг 22-24 ноябрь кунлари давлат ташрифи билан Жанубий Кореяда бўлган эди.

Ташриф доирасида мамлакатимиз раҳбари шарафига Жанубий Корея президенти қароргоҳида кечки овқат уюштирилиб, унда санъат ва маданият арбоблари қаторида ўзбек томошабинларига «Сарой жавоҳири» сериалидаги Тангем образи орқали яхши таниш бўлган 46 ёшли актриса Ли Ёнг Э ҳам иштирок этганди.

Фото: «news2day»

Айтишларича, «Тангем» Ўзбекистоннинг Жанубий Кореядаги сайёҳлик элчиси сифатида фаолият юритади.

05 Январ, 2018

Чироқ муаммо бўлмайди! Тошкент вилоятида янги ГЭС қурилади

Жамият 05/01/2018 0 3376

Аввал хабар берганимиздек, халқ депутатлари Тошкент вилояти кенгашининг навбатдан ташқари сессияси бўлиб ўтди. Сессияда Ўзбекистон Президенти Шавкат Мирзиёев иштирок этди.

Сессияда «Xabar.uz» ахборот-таҳлилий порталининг вакили ҳам қатнашди. Унинг маълумот беришича, видеоселектор шаклида ўтган сессияда Президент Шавкат Мирзиёев сўзга чиқиб, мамлакатдаги электр таъминотининг истиқболи хусусида ҳам айрим маълумотларни айтиб ўтган.

Манбанинг хабар беришича, давлат раҳбари ўз маърузасида Тошкент вилоятида янги гидроэлектр станцияси қурилишини ҳамда яқин беш йилда электр энергиясининг 32 фоизини ГЭСлар таъминлашини, шунда электр ишлаб чиқариш арзонга тушишини маълум қилган.

Эслатиб ўтамиз, мазкур йиғилишда Шавкат Мирзиёев масъулларга одамлар Тошкент вилоятида «свет» ўчиши нималигини билмаслиги, 80 та трансформатор жадаллик билан таъмирланиши ҳақида кўрсатма берган эди.

Тошкент вилоятида 2018 йили 300 та замонавий болалар боғчаси қурилади

Жамият 05/01/2018 0 2327

Аввал хабар берганимиздек, халқ депутатлари Тошкент вилояти кенгашининг навбатдан ташқари сессияси якунланди. Сессияда Ўзбекистон Президенти Шавкат Мирзиёев иштирок этди.

Сессияда «Xabar.uz» ахборот-таҳлилий порталининг вакили ҳам қатнашди. Унинг маълумот беришича, Президент Шавкат Мирзиёев ўз маърузасида вилоятдаги мактабгача таълим муассасаларининг аҳволи, бу борада қилиниши лозим бўлган ишларга ҳам тўхталиб ўтган.

«Тошкент вилоятида 2018 йили 300 та замонавий болалар боғчаси қурилади», деб айтган Ўзбекистон раҳбари.

Эслатиб ўтамиз, Шавкат Мирзиёев 2017 йилнинг 22 декабридаги парламентга мурожаатида болалар тарбиясида энг асосий бўғин ҳисобланган мактабгача таълим тизимининг жамиятимиз ҳаётидаги катта ўрни ва аҳамиятини эътиборга олиб, Мактабгача таълим вазирлигини ташкил этилгани, бу соҳанинг моддий-техник базасини мустаҳкамлашимиз, жумладан, яқин 3-4 йилда барча ҳудудларда минглаб янги боғчалар қуришимиз, таълим-тарбия сифати ва даражасини янги босқичга кўтаришимиз лозимлигини таъкидлаган эди.

Тошкент вилояти ҳокими ўринбосарлари ўзгарди

Жамият 05/01/2018 0 5027

Аввал хабар берганимиздек, айни вақтда халқ депутатлари Тошкент вилояти кенгашининг навбатдан ташқари сессияси бўлиб ўтмоқда. Сессияда Ўзбекистон Президенти Шавкат Мирзиёев иштирок этмоқда.

Сессияда «Xabar.uz» ахборот-таҳлилий порталининг вакили ҳам қатнашмоқда. Унинг маълумот беришича, видеоселектор шаклида ўтаётган сессияда ташкилий масала кўрилган. Манбанинг хабар беришича, Санжар Юсупов вилоят ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари этиб тайинланган. Шунингдек, сессияда ҳокимнинг яна бир ўринбосари тайинлангани айтилган, аммо унинг исм-фамилияси ва лавозими маълум қилинмаган.

Эслатиб ўтамиз, сал аввал вилоят ҳокими вазифасини бажарувчи Ғуломжон Ибрагимов​ Тошкент вилояти ҳокими этиб тайинлангани ҳақида хабар бергандик.

Воқеалар ривожини биз билан бирга кузатинг!

Шавкат Мирзиёев: «Кимда-ким вилоят, туман ҳокимини Президентдан берухсат терговга чақирса, қамалади!»

Жамият 05/01/2018 0 6475

Аввал хабар берганимиздек, айни вақтда халқ депутатлари Тошкент вилояти кенгашининг навбатдан ташқари сессияси бўлиб ўтмоқда. Сессияда Ўзбекистон Президенти Шавкат Мирзиёев иштирок этмоқда.

Сессияда «Xabar.uz» ахборот-таҳлилий порталининг вакили ҳам қатнашмоқда. Унинг маълумот беришича, видеоселектор шаклида ўтаётган сессияда маъруза қилган давлат раҳбари, жумладан, шундай деган:

«Жаноб Бобоев синовдан ўтмади. Мен уни ишдан олдим. Амал ўзи бу синов. Бугун ўзим ишонган кадрни олиб келдим».

Сессияда ташкилий масала кўрилган. Манбанинг хабар беришича, шу пайтгача вилоят ҳокими вазифасини бажарувчи Ғуломжон Ибрагимов​ Тошкент вилояти ҳокими этиб тайинланган.

Ўзбекистон раҳбари кимда-ким Президентдан берухсат вилоят, туман ҳокимини терговга чақирса, қамалишини айтган. Турли ташкилотларга янги ҳокимни ғийбат ва муҳокама қилмасликни буюрган.

Воқеалар ривожини биз билан бирга кузатинг!

Нурафшон шаҳрига янги ҳоким тайинланди

Жамият 05/01/2018 0 2061

Аввал хабар берганимиздек, айни вақтда халқ депутатлари Тошкент вилояти кенгашининг навбатдан ташқари сессияси бўлиб ўтмоқда. Сессияда Ўзбекистон Президенти Шавкат Мирзиёев иштирок этмоқда.

Сессияда «Xabar.uz» ахборот-таҳлилий порталининг вакили ҳам қатнашмоқда. Унинг маълумот беришича, видеоселектор шаклида ўтаётган сессияда ташкилий масала кўрилган. Раҳимов Усмон Исмоилович Нурафшон шаҳрининг ҳокими этиб тайинланган. У бунгача вилоят ҳокимининг капитал саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари лавозимида ишлаб келаётган эди.

Воқеалар ривожини биз билан бирга кузатинг!

Яна