Жорий йилнинг 9 июл куни Бухоро шаҳридаги кўп қаватли уйлардан бирида ёнғин содир бўлди. Аҳоли томонидан ҳолат юзасидан зудлик билан ёнғинни бартараф этиш учун Фавқулодда вазиятлар бошқармасига мурожаат қилинган.

Фавқулодда вазиятлар ходимлари ҳодиса жойига етиб келгунга қадар, ҳудуд профилактика инспектори — майор Мадиёр Ҳакимов ёнғинни ўчиришга киришган. Ва маҳалла аҳолисини ҳам шунга жалб этган.

Биргаликдаги тезкор ҳаракат, масъулиятни ҳис қилишдаги миллий ҳамжиҳатлик тез фурсатда юзага келиши мумкин кенгроқ хатар - одамларнинг ҳаёти ва мулкинининг батамом ёниб кетмаслиги олди олинган.

Профилактика инспектори ўзини аямай, ёнғинни ўчириш хизмати етиб келишини кутиб турмай, кўп қаватли уйнинг юқори қисми балконидан туриб, челаклаб сув сепиш орқали ўтни ўчирган.

«Айни ўша пайтда ёнғин содир бўлган хонадоннинг эшиги қулф, эгасининг ҳам йўқлиги бундай вақтда анча кўнгилсиз воқеаларни келтириб чиқариши мумкин эди. Албатта, гап бу ерда фақат профилактика инспекторининг қонун ва тартибни сақлаш, балки халқ осойишталиги йўлида фидойилик билан хизмат қилаётганини кўрсатиш эмас, балки унинг жуда қисқа фурсатларда аҳолини ҳам ҳамжиҳатликка ундаб, хавфсизлик посбони эканини амалда исботлай олганида»,-дейди ёнғин содир бўлган Баҳоуддин Нақшбанд маҳалла фуқаролар йиғини раиси.